Evardone ha DPWH: Tagan panahon pagbulig ha safety assessment o warning ha mga pribado nga imprastra

Ginaaghat ni Eastern Samar Representative Ben Pagaran Evardone an Department of Public Works and Highways or DPWH nga magbiling hin oras o maghimo programa para buligan iton pribado nga molupyo ha Sinirangan Samar. Ini in mahitungod han ira mga tagsa nga infrastructure projects ha ira mga tuna, sugad hin pagbalay, semento nga pag-alad, paghimo pribado nga kanal o flood control, o bisan paghimo landslide protection ha mga pribado nga mga bukid.

Sering ni Evardone an DPWH an may-ada kapasidad para mapadig-on iton mga pribado nga balay ngan matagan proteksyon hiton pribado nga tag-iya hin tuna iton ira katunaan.

“Yana nga maagsob iton bagyo, ngan panalagsa nga linog, dako iton mahibubulig hiton DPWH ha mga pribado nga mga panimalay, bisan ha paghatag safety assessment o abiso ha ira ngan para mahibaruan iton kakusgon hiton ira tagsa nga mga balay o ano pa man nga inprastraktura,” siriring ni Evardone.

Samtang iton tagsa nga Municipal o City Engineering Office iton may-ada mando hine, maupay gihapon kun makig-usa iton DPWH pagbulig hiton evaluation ngan assessment hiton estado hiton pribado nga imprastraktura.

“Damo iton mga pribado nga pamilya nga waray sobra nga kwarta para kumuha hin pribado nga engineer nga maghahatag damage report o safety assessment hiton ira tagsa nga panimalay, nga kinahanglan manta buligan,” siring ni Evardone.

Sumala pa ha mambabalaud aram niya nga damo iton kabilinggan yana hiton nasabi nga ahensya particular na ha rehabilitasyon han mga imprastraktura panggobyerno nga naruba han bagyo Yolanda, Ruby ngan Nona.

“Unta matagan hiton DPWH, labi na gud iton mga engineers hine, hin bakante nga oras para hine nga safety assessment, evaluation o advise,” siring ni Evardone.

Mahinunumduman nga damo an mga balay ug iba pa nga pribado nga inprastraktura sugad han Singbahan ha Bungto han Guiuan in naruba/ruspak paglabay han Bagyo Yolanda.

PARA HIN KADUGANGAN PA NGA MGA SUMAT SUGAD HINI, I-LIKE IT ATON FACEBOOK PAGE SANGKAY, I CLICK LA ADI:

Kuya Jayson M.

Balyu-an ni Kuya "Jayson M."

SOURCE: MARK O. ALIDO