"Maupay nga kalsada, susi ha hingpit nga pag-uswag hiton aton probinsiya." - Evardone
- 03:25 PM Jayson Macapanas
- Jun 20, 2018
- 2 min read
“An reconstruction ngan pag-pakaupay hin upat nga mga tulay ha Brgy Hinolaso, ha bungto han Dolores in maghahatag hin madagmit, mas convenient ngan safe nga pagbibiyahe hiton mga residente, pagdadara hin mga produkto ngan serbisyo.“
Ini an nagin pahayag ni Cong. Ben P. Evardone ha gindumara nga programa para han groundbreaking han reconstruction/improvement han Hinolaso Bridge I, II and III, ngan Villahermosa Bridge, han Huwebes, Hunyo 14 ha Brgy Hinolaso, Dolores.
Sumala pa kan Evardone, hiya in natoo nga “kalsada” la gihap iton susi para han hul-os nga pag-orsa hiton probinsya. Kon mahuman na an konstruksyon hini nga mga tulay, siring pa niya, magdudurot ini hin mas madagmit nga pagdara hiton mga produkto ngadto ha bungto, mas mahabobo an gastos ha transportasyon, mahitaas an kita han mga parag-uma, mapapakusog an ekonomiya ngan ma-uswag an panginabuhi han mga parag-uma.
Ini daw in aabaton dire la ha bungto han Dolores, kundi ha mga paghigrani nga mga bungto, sugad nala an bungto han Maslog, nga trese la ka kilometro an kahirayo tikang ha Brgy. Hinolaso.
“In Eastern Samar, we need good roads, especially those that will open up interior remote areas… Roads are important for a nation’s growth and crucial in the fight against poverty,” siring pa ni Evardone.
Iguinsumat naman ni DPWH Eastern Samar DEO chief Engr. Manolo Rojas nga an kabug-usan nga balor han nasabi nga proyekto in P105 million, ug ini in napondohan ha ilarom han 2017 calamity fund.
Sumala pa kan Rojas, an nasabi nga proyekto in kaparte han “build, build, build” nga inisyatibo ni Presidente Duterte. Usa nga 'massive infrastructure spending' hiton gobyerno nga makakag-duso ha socio-economic development.
Samtang, dako naman an pagtapod ni Cong. Evardone nga mahuhuman na an pagkongkreto han Maslog-Hinolaso nga bahin ha budget nga P115M.
Nahisumat han magbabalaud nga para ha tuig 2019, nga hiya in nag-propose hin P453M nga magkokompleto ha pag-kongkreto han bug-os nga road network.
Ha lain nga bahin, iguinsumat pa ni Rojas nga para ha Eastern Samar, nag-alotaga an national government hin bilyones ka pesos nga pondo para ha construction, improvement ug maintenance ha magkalain-lain nga infra projects.
“Our network development plan is to link Maslog to Jipapad in order for this road network to form a loop. This will eventually link Maslog to San Jose de Buan in Samar, to form a central highway”.
Comments