Fake FB Accounts, Mawawara Na? Evardone ha Senate: Ipasa an SIM Card Registration Bill

Ginlalauman ni Eastern Samar Representative Ben Pagaran Evardone an pagpasa han House Bill 5231 antes matapos an 16th Congress. Mas kilala an House Bill 5231 komo Subscriber Identity Module o SIM Card Registration Bill.

Panuyo hine nga balaudnon an pagrehistro han ngatanan nga prepaid SIM card ha Pilipinas agud maibanan an paggamit han nasabi nga teknolohiya dida hin kriminalidad sugad hin Kidnap-for-ransom.

"Oras nga mahipasa ine nga balaudnon, magkaka-ada rehistro han mga prepaid SIM card. Tungod hine, ginlalauman nga mawawara an pag abuso paggamit hine nga teknolohiya," siring ni Evardone.

Dugang pa ni Evardone, maiibanan an pag gamit han SIM Card ha kriminalidad labi na gud an paggamit han celfon komo usa nga detonator hin bomba. Nagmamando ha mga Public Telecommunications Entities (PTEs) ngan direct sellers hin mga SIM Cards an pagrehistro han mga personal nga impormasyon, sugad han ngaran ngan address han kun hin o man an tag iya han nasabi nga SIM Card.

"Kinahanglan umaro iton PTE o direct seller hin government-issued valid ID han mamaralit han SIM Card antes hira matagan hine," siring ni Evardone.

Sumala han balaudnon, pinaagi la hin Court Order pwede makuha han ordinaryo nga tawo an personal nga impormasyon han mamaralit. Subay han nasabi nga balaudnon, obligasyon han direct seller paghatag kopya han rehistro ngadto han iya PTE, ngan an PTE naman ngadto ha National Telecommunications Commission o NTC.

Obligasyon liwat han kada PTE maghatag han lista han iya mga direct sellers ngadto ha NTC. Ginmamanduhan liwat an PTE maghatag updates ha NTC mahitungod han bag-o nga mga direct sellers.

Mapaparusahan an direct seller nga magtalapas hine nga balaudnon, tikang hin fine nga 5,000 ngada hin P50,000 ngan pagsara han negosyo komo direct seller.

Samtang, mapaparuhasan an magtalapas nga PTE o kun hin o man nga opisyal hine tikang hin P300,000 ngada hin P1,000,000. An nasabi nga balaudnon in nahipasa na ha Senado tikang ha Kongreso.

PARA HIN KADUGANGAN PA NGA MGA SUMAT SUGAD HINI, I-LIKE IT ATON FACEBOOK PAGE SANGKAY, I CLICK LA ADI:

Kuya Jayson M.

Balyu-an ni Kuya "Jayson M."

SOURCE: MARK O. ALIDO