Evardone, nagpagawas hin 10-Point Agenda para ha sektor hiton pangisda

Iginpagawas ni Eastern Samar Representative Ben Pagaran Evardone an iya 10-point nga adbokasiya nga an panuyo magpapahataas han lebel sektor han mga magirisda, labi na gud ha Eastern Samar, ngan magpareho an pagtratar han gobyerno ha agrikultura pantuna o land-based agriculture.

Ha yana nga estado, an sektor han mangirisda in gingigiyahan ngan ginkakaptan han Bureau of Fisheries and Aquatic Resources (BFAR).

Sering ni Evardone, kaapi han iya iginduduso an mga masunod nga mga inisyatibo:

1. Paghimo han Department of Fisheries and Aquatic Resources (DFAR), agud maparig-on, mas maging maupay an serbisyo han gobyerno ngadto han mga mangirisda ngan ira tagsa nga pamilya ug mahimo nga an Department of Agriculture in tumutok nala ha pantuna nga agrikultura.

2. Pagmando ha mga Gobyerno Probinsyal nga magbutang hin kalugaringon nga opisina han Fisheries and Aquatic Resources Officer para hin mas maupay nga serbisyo ha katawhan.

3. Pag-establisar hin multi-stakeholder ngan inter-agency research and development center ha kada rehiyon nga an siyahan nga panuyo in paghatag ayuda teknikal o technical assistance ha mga probinsiya, siyudad o bungto nga harani ha dagat, bahin ha mga polisiya, programa ngan proyekto mahitungod ha pangisda ha wholistic nga pamaagi.

4. Pag establisar hin One Coastal Town, one Small-scale Fish Port Project agud mapadamo pa iton dakop nga produkto han dagat.

5. Pag-establisar han One Coastal Province, One Fish Port Complex, sugad han General Santos Fishport Complex, komo usa nga istratehiya agud dumamo an trabahante ngan pagpahataas han lokal nga ekonomiya.

6. Pag-amyenda han balaud han pangisda o Fisheries Code agud mahiupod an mga mekanismo nga magpaparig-on pa han nasabi nga sektor ngan magpapadayon an paglangbo han ekonomiya apisar han climate change.

7. Paghimo han lain nga Magna Carta para han mga mangirisda ngan ira tagsa nga pamilya kapareho han Magna Carta han mga parag uma.

8. Pagpasa hin balaudnon nga magdedeklara han Probinsya han Sinirangan Samar komo usa nga Philippines’ Pacific Aquamarine Resources Gateway ha Kabisayaan, agud maestablisar an Trans-Pacific Seaport sugad man han Samar Island Pacific Fisheries and Aquatic Resources Research and Development Center.

9. Pag-establisar han lain nga Agriculture Regional Office para han Isla han Samar.

10. Pag-establisar han Eastern Samar Fish Port Complex, pareho han Davao City Fish Port Complex.

Samtang, ginsuportahan ni Congressman Evardone an panukala nga maghimo hin marine protected areas ha ngatanan nga siyudad ngan bungto nga harani ha dagat (HB5836), ngan sugad man han mariculture development (HB2934).

PARA HIN KADUGANGAN PA NGA MGA SUMAT SUGAD HINI, I-LIKE IT ATON FACEBOOK PAGE SANGKAY, I CLICK LA ADI:

Kuya Jayson M.

Balyu-an ni Kuya "Jayson M."

SOURCE: MARK O. ALIDO