First National Skimboarding Competition, nagtikang na

Nagkaabot na in mga contestants tikang ha magkalain-lain nga lugar ngadto ha bungto hiton Taft para han First National Skimboarding Competition.

Nahibaruan ha guinbuhat nga pamakiana han RVFM kan Nards Balmes nga han Huwebes pa han kulop nagkaabot ha Dangkalan Pacific Beach Resort in mga skimmers tikang ha Tulusa, Tanuan, ngan Dulag ha Leyte.

Sumala kan Balmes, may ada guihapon pira nga contestants nga inmabot ha pareho nga adlaw nga tikang naman ha Cebu ug kakulop la han aga in umabot na guihapon in iba pa tikang naman ha Davao ngan Legaspi City.

Una na nga iguinpasabot han DANGKALAN Pacific Beach Resort managment han Taft, Eastern Samar nga hira an mangunguna ha pagbubuhaton nga First National Skimboarding Competition dinhi ha aton probinsiya.

Nahibaruan liwat nga kaapi ha nag-organisa hini nga event in an world championship trophy holder yana han kanan Zap World Championship of 2014 nga guinbuhat didto ha Delaware, United States of America nga hi Roderick Celada Bazar, nga kilala ha tawag nga Manoy.

An nasabi nga Skimboarding Competition in may ada tulo nga mga categories.

Una hini dinhi in an 'Open Category' kon diin 15 thousand an first price, 10 thousand naman an 1st runner up, 7 thousand an 2nd, 5 thousand an 3rd runner up ug 500 pesos naman an ikalima hasta ha ika napulo nga pwesto.

Pareho naman iton kantidad hiton magigin-premyo ha duha pa nga mga category. Ini in an 'Grommet Category' ngan 'Wahine Category'. An Grommet Category in para ini ha mga skimmers may edad 15 anyos pahabobo ngan an Wahine naman in para ha mga kababayen-an.

Hini nga duha nga category, 5 thousand an first price, 4 thousand naman an 1st runner up, 3 thousand an 2nd, 2 thousand an 3rd runner up ug 500 pesos guihapon an ikalima hasta ha ika napulo nga pwesto.

Una na nga nag-host an Dangkalan Pacific Beach Resort hin usa nga local skim competition ha Taft, hadton mga nakalabay nga mga tuig nga guin-atendiran hin local skim enthusiasts tikang dinhi ha Borongan. Tinguha han nasabi nga competisyon nga ipakilala ini nga nasabi nga bag-o nga sports ha mga locals han Taft ug ha hagrani nga bungto hadto.

Pero yana, pagdasig ni Nards Balmes nga liwat tag-iya hiton Dangat Outdoor Shop nga ini nga masunod nga event in diri nala usa nga lokal nga buruhaton kundi National na kumo usa guihapon nga pagpakilala hiton aton probinsiya nga maguin-usa ha mga lugar nga pwede maguin-skimboarding destinations dinhi ha Pilipinas.

Dugang pa niya nga ira yana guinpu-push iton Sports Tourism para maipahibaro ha iba nga lugar nga may-ada kita guinbubuhat nga pwede maguin-rason para bisitahon daman kita dinhi ha Eastern Samar.

An Skimboarding in usa nga sports nga alagid-agid ha tinatawag nga surfing. An kinaibahan la ha surfing kay ini in guinbubuhat ha mas dagko iton balud nga baybayon.

Samtang an skimboarding naman in nagamit guihapon hin paru-pareho ha surfboard kun diin mas maguru-guti la ini ngan binubuhat ini ha mga baybayon nga may ada mag-upay nga shore-break nga harani ha shore line ug mas gudti pa an balud.

Nakaka-entertain an skimmboarding ha mga magkurulaw dara kay nakakapaghimo hin magkalain-lain nga mga tricks an mga nagmumulay hini.

Magpapadayon yana nga adlaw hasta buwas, Dominggo an First National Skimboarding Competition didto ha Taft.

PARA HIN KADUGANGAN PA NGA MGA SUMAT SUGAD HINI, I-LIKE IT ATON FACEBOOK PAGE SANGKAY, I CLICK LA ADI:

Kuya Jayson M.

Balyu-an ni Kuya "Jayson M."