Evardone: Scholarship Program han Weather Science may balaud na

Ginpanawagan ni Eastern Samar Congressman Ben Evardone an ngatanan nga stakeholders ha high school education, labi na gud iton mga prinsipal, mga science teachers, ngan mga kag-anak han kabataan nga tagan pakusgon pa an pag-aghat ha mga kabataan dida han ira interest ha science and technology, partikular na ha bahin han weather science ngan meteorology.

Sering ni Evardone nga an napirmahan ni Presidente Benigno PNoy Aquino nga balaud o Republic Act No. 10692 in diri la nagmamando han modernization han Philippine Atmospheric, Geophysical and Astronomical Services Administration o PAGASA.

"Ginmamanduhan liwat han nasabi nga balaud an pagbutang hin scholoarship program para hin undergraduate or college courses ha Meteorology, labot la han Post-graduate scholarships," sering ni Evardone.

An nasabi nga scholarship in iginmamando nga mahi-implementar ha sakob hin 3 ka tuig tikang han pag aprubar han balaud han naglabay nga Nobyembre 2015.

"Subay liwat han balaud, maghihimo hin bag-o nga salary scale para han empleyado han PAGASA," sering ni Evardone.

Ine nga pagbag-o o pagmoderno han PAGASA in napadagmit tungod han eksperyensya han mga naglabay nga mga peligro o destroso han bagyo Yolanda, Ruby, ug han linog ha Bohol.

"Kinahanglan naton suportahan an kabataan dida han ira interes ha science and technology, labi na gud ha weather science, agud madiskobrehan naton ngan ira mga potensyal, ngan masiguro an padayon nga suplay hin mga edukado ngan dekalibre nga Filipino scientists," sering ni Evardone.

Iginpatapud ni Evardone an iya padayon nga suporta ha edukasyon, sugad han pagsiguro han scholarships, labi na gud ha bahin han science and technology.

Han diri pala maiha, nagpahamtang hi Congressman Evardone han iya suporta han padayon nga pag-abante han science and technology labi na gud ha bahin han edukasyon.

Sering ni Evardone, an iya pagbotos ha Konggreso hine nga bag-o nga bag-o nga balaud in nasusubay han iya personal nga adbokasiya kun tawagon Filipino Advancement in Science and Technology Through Educational Reinforcement o FASTTER Advocacy.

PARA HIN KADUGANGAN PA NGA MGA SUMAT SUGAD HINI, I-LIKE IT ATON FACEBOOK PAGE SANGKAY, I CLICK LA ADI:

Kuya Jayson M.

Balyu-an ni Kuya "Jayson M."

SOURCE: MARK O. ALIDO