Evardone: Kabataan bawal umangkas ha single nga motor

Ginpapanawagan yana ni Eastern Samar Congressman Ben Pagaran Evardone nga nalingkod komo Vice Chairman han Committee on Transportation ha Kongresso an mga barangay ngan mga maestra/maestro ha Sinirangan Samar nga bumulig mag-abiso ha katawhan mahiunong han bag-o nga balaud nga Republic Act 10666, mas kilala kon tawagon "Batang Paslit Ban".

Igindidiri han nasabi nga balaud an pagpasakay ha single nga motorsiklo han bata nga diri pa malahos 10 anyos an pangidaron, labi na gud ha dagko nga mga kalsada o highway.

Sering ni Evardone panuyo hine nga balaud an paghirayo-an ha disgrasya han bata ngan han driver kay iton ordinaryo o average nga kadak-on hiton bata nga Pilipino nga diri pa 10 anyos an pangidaron in tuman la nga nakakalikos-hangkop hiton lawas hiton driver ngan tuman la nga nakakaabot ha tamakan o footrest han motor.

"Kinahanglan na magpahi-ara iton mga kag-anak labi na gud an driver hine nga balaud para oras nga gumawas an implementing rules, diri na hira hingalimot han nasabi nga sugo han balaud," dugang pa ni Evardone.

Subay han balaud, an hin-o man nga madakop nga may angkas nga bata in pagmumultahon hin P3,000 ha una nga violation; P5,000 ha ikaduha ngan P10,000 naman ha ikatulo. Kun may pagsupak la gihapon ha ikaupat nga beses, revocation han driver’s license an ira atubangon.

"Kun an angkas nga bata 10 anyos na o mas hataas pa an pangidaron, pwede na hiya makaangkas han two-wheeled nga motor, kundi kinahanglan la giuhapon nga iya na nahahangkupan an lawas han driver ngan an iya mga seki in komportable nga naabot han footrest o tamakan han nakaangkas nga pasahero," siring ni Evardone.

Sumala kan Evardone, rasonable iton nasabi nga balaud sanglit gintutugot an pag-angkas han motor ha mga remote areas ha oras nga may ada emergency han bata sugad kun kinahanglan niya pagdad-on ha ospital ngan waray iba nga sarakyan nga pwede magdara hine.

An mga LGU traffic enforcers in pwede igdeputize han LTO para han pagpasunod hine nga balaud.

PARA HIN KADUGANGAN PA NGA MGA SUMAT SUGAD HINI, I-LIKE IT ATON FACEBOOK PAGE SANGKAY, I CLICK LA ADI:

Kuya Jayson M.

Balyu-an ni Kuya "Jayson M."

SOURCE: MARK O. ALIDO