Evardone, igpapadayon suporta ha civil society organizations

Igpapadayon ni Liberal Party ngan Eastern Samar Congressman Ben Pagaran Evardone an paghatag suporta ha mga inisyatibo ngan kun ano man pag-gios (movement) nga an siyahan nga panuyo an pagpakusog, pagparig-on ngan paghatag kaangayan nga importansya ha mga People's Organizations (POs), Civil Society Organizations (CSOs), Non-Government Organizations (NGOs), ngan mga Kooperatiba.

"Importante nga pakusgon an ligal nga sistema (legal system) para hine nga mga grupo," sering ni Evardone. "Historically, iginpakita na hine nga mga grupo an ira dedikasyon ngan commitment ha pagpaursa han indibidwal nga kinabuhi, ngan han bug-os nga nasud.

Ha ordinaryo nga mga panahon, ine nga mga grupo aktibo ngan 'involved' ha pagserbisyo ha katawhan, labi na gud ha mga hisgutay nga nagpapahalarum han public opinion ha kun ano man nga problema o isyu nga nakakaapekto ha katawhan" sering ni Evardone.

"Han panahon han kasidman han demokrasya, binulig hira pagpatumba han diktadorya. Ngada yana, nabulig pa hira ha mga biktima hin pag-abuso. Aadto pa hira ha mga komunidad nga ginruspak han naglabay nga mga kalamidad, bagyo, lunop, linog, giyera," dugang pa ni Evardone.

Iginpahamtang ni Congressman Evardone an iya mga plano nga reporma para han mga civil society organizations apesar han iya inabat nga kabido ha mga pulitiko ngan ira mga kakuntsaba paggamit han peke o 'ghost' nga mga NGOs ngan CSOs agud makapanalapi hira ha gobyerno.

"Tungod ha ira, naruba an maupay nga record han CSOs ngan NGOs. Kundi, tungod man liwat ha ira naabre an okasyon pagreview han mga balaud para hine nga mga grupo," sering ni Evardone.

Kaupod han plano igduso ni Congressman Evardone an pagtratar komo usa nga krimen an mga buhat hin panguwat o fraud ha pagrecruit hin miyembro ha nasabi nga mga grupo, paghimo hin peke nga grupo, paggastos han pondo han grupo nga diri subay han kaladnganan han organisasyon, pagbutang hin mas hataas nga parusa ha mga opisyales han gobyerno nga nahidadabi ha paglimbong.

Karuyag liwat ni Evardone tagan insentibo ug mga dugang nga mga prebilihiyo para han mga community organizers, sugad han tax incentives, subsidies, discounts, scholarships, medical and health insurance, dislocation o ano pa nga allowance, pabahay, ngan retirement pension.

Plano liwat ni Evardone buligan pagduso ha Kamara han mga balaudnon nga nagpapasimpli han akreditasyon hine nga mga grupo agud hira makagpartisipar ha budget deliberations ha Konggreso ug mga Sanggunian, ngan mas mapadali an ira akses (access) ha mga pondo nga serbisyo ha gobyerno.

Utro nga iginsumat ni Evardone nga diri hiya kaapi han mga opisyales nga na-'involved' hin anomalya kaupod mga CSOs o NGOs. Mahinunumduman nga han naglabay nga 2014 gumawas an ngaran hin anay nga mga congressman han Eastern Samar nga nahidadabi han Napoles PDAF scam.

Hi Congressman Evardone in nadalagan para han iya ikatulo ngan pinal nga termino komo kongresista.

PARA HIN KADUGANGAN PA NGA MGA SUMAT SUGAD HINI, I-LIKE IT ATON FACEBOOK PAGE SANGKAY, I CLICK LA ADI:

Kuya Jayson M.

Balyu-an ni Kuya "Jayson M."

SOURCE: MARK O. ALIDO