Evardone, pinasalamatan hi P-Noy ngan an DOE ha paghatag prayoridad pagbutang kuryente dinhi ha E. S

Ginpasalamatan ni Eastern Samar Congressman Ben Evardone an administrasyon ni Presidente Benigno PNoy Aquino kaupod han pamilya han Department of Energy o DOE dida han ira paghatag hin prayoridad nga pagbutang kuryente ha Eastern Samar ha ilarom han Sitio Electrification Program o SEP program han National Electrification Administration o NEA.

Sering ni Evardone, waray makawang an iya panlimbasog pangaro pondo nga nag-abot hin haros P26.4 Million para hine nga SEP program han DOE para han tuig 2014 ha Eastern Samar tungod na gihapon han suporta han Administrasyon Aquino.

Pinaagi han nasabi nga Sitio Electrification Program o SEP, nabutangan kuryente an 25 nga mga sitio ha magkadilain nga barangay o bungto ha Eastern Samar.

Sumala han datus nga ginhatag kan Congressman Evardone, ‘energized’ na an mga sitio Karokalibtungan ngan Kabog ha Barangay Balogo, Balangkayan.

Samtang ha Borongan City, ‘energized’ na liwat an Camada Heights, Barangay Camada, an Ogbon, ha Palara, sugad man an Nabiyawan ha Sabang Suribao.

Ha Bungto han Guiuan, nabutangan kuryente ha Isla han Manicani, labi na gud ha Tinago ngan Purok 1, Buenvista, Purok 1 ngan 2 ha Bana-ag, ngan Purok 1, Ca-antolan, ngan Baltao ha Hamorawon.

Sugad man nga nabutangan kuryente ha Sitio Tugas, ha Barangay Alugan; Lipata ha Barangay Benogawan; Sitio Tabok ha Barangay Baras; Sitio Okpol ha Barangay Tabo, ngatanan ha Bungto han San Policarpo.

Ha Bungto han San Julian, may kuryente na liwat ha Sitio Kawilan, Brgy. Bunacan sugad man ha Sitio Palo Uno ngan Karuyagon ha Barangay Putong.

Ha Bungto han Gen, MacArthur, nabutangan kuryente ha Sitio Salagan, ha Barangay 7, sugad man ha sitio Banika ha Barangay 11 ha Bungto han Llorente, ngan ha Sitio Maylemon ha Barangay 1 ha bungto han Jipapad.

Samtang, damo pa nga mga sitio o purok in gintratrabaho an pagbutang han linya han kuryente.

Igin-iimplementar ine nga energization program han Eastern Samar Electric Cooperative o ESAMELCO mahoman mapondohan ine ngan proyekto pinaagi hin pagpasa in balaud ha Kongreso kun tawagon an General Appropriations Act.

Hi Congressman Evardone in usa nga Vice Chairman han Committee on Appropriations ha Kamara de Representantes ug usa nga lider han partido ni President Aquino ngan Mar Roxas II, an Liberal Party.

PARA HIN KADUGANGAN PA NGA MGA SUMAT SUGAD HINI, I-LIKE IT ATON FACEBOOK PAGE SANGKAY, I CLICK LA ADI:

Kuya Jayson M.

Balyu-an ni Kuya "Jayson M."

SOURCE: MARK O. ALIDO