EVARDONE: Overseas and Foreign Policy, akon priority

Suportado ni Liberal Party lider ngan Eastern Samar Congressman Ben Pagaran Evardone an inisyatibo nga nagduduso paghatag haluag nga poder ha mga ahensya han gobyerno nga nagmomonitor ngan nag-iimplementar han overseas policies ngan foreign relations han Nasud Pilipinas.

“Kun may ada usa nga area nga angay tagan regular nga pagbag-o hin balaud, ine an overseas o foreign policy,” sering ni Evardone.

“Kami ha konggreso, bisan an Presidente, waray kontrol ha mga pwersa ha gawas han nasud, ngan an aton proseso hin paghimo balaud in diri nakakalanat (cope up) ha kinaadlaw nga panginahanglan nga pagbag-o hin palisiya,” sering ni Evardone.

Para kan Evardone, an pagkaada mawada (flexible) ngan updated nga overseas and foreign policy in nakakadugang proteksyon ha mga OFWs, ngan nagsisiguro han seguridad politikal ngan seguridad han ekonomiya han nasud Pilipinas.

“Sanglit, an akon approach in diri masyado ha paghimo hin balaudnon, kundi pagsigurado nga may-ada iton Pilipinas sistema hin balaud nga nakakalanat ha kinaadlaw nga panhitabo ha bug-os nga kalibutan,” sering ni Evardone.

“Ha akon duha ka termino komo konggresista, an amon ginbuhat ha Konggreso in pagbulig nga masiguro an kahimyang ngan seguridad han aton nasud tikang hin mga panhadluk ha gawas (external threats) ngan kun ano man nga pwersa, sugad man han pag siguro han seguridad han aton mga OFWs,” sering ni Evardone.

“Sugad man, amon gintagan suporta hi Presidente Aquino dida han iya mga panlimbasog mahitungod han aton national security, sugad nala han issue mahitungod ha West Philippine Sea,” dugang pa ni Evardone.

Samtang, iginpahamtang ni Congressman Evardone an iya mga inisyatibo ha Konggreso nga an mga panuyo in pagpakusog han overseas and foreign policy han gobyerno. Kaupod han mga inisyatibo ni Congressman Evardone an masunod:

‘The farther-the closer’ initiative. Pinaagi hine nga inisyatibo, karuyag ni Evardone masigurado nga kada OFW in regular nga nakokontak han iya pamilya ngan han gobyerno.

“Kinahanglan mayda regular nga update han estado han aton mga OFW ngan han lugar nga iya inuukyan ha gawas kay mas harayo an aton OFW ha aton, mas peligroso ha iya,” sering ni Evardone.

“Usa ine han rason kun kay ano padayon an aton suporta magkaada libre ngan makusog nga wi-fi signal ha mga pampubliko nga lugar ha bug-os nga nasud,” sering ni Evardone.

‘Emergency Repatriation Support Fund’ initiative. Pinaagi hine nga inisyatibo, karuyag ni Evardone masigurado nga an gobyerno may-ada bastante ngan abilable nga pondo paggamit para han emergency repatriation han aton OFWs.

“Ginhuhunahunaan ko an pagkaada hin establisado nga ‘repatriation support fund’ nga self-liquidating, o natubo, ngan pwede ine mahitabo pinaagi hin paghimo hin Government-owned and controlled corporation o GOCC nga magkakapot hine,” sering ni Evardone.

‘Uwian Na’ initiative. Pinaagi hini nga inisyatibo, karuyag ni Evardone pakusgon an palisiya nga nag-aaghat ha mga OFWs nga umuli na.

“Kinahanglan ngan an gobyerno magkaada hin economic o livelihood program para han OFWs agud hira ma-engganyo umuli pagkatapos hin pira katuig nga pagtrabaho ha gawas han nasud,” sering ni Evardone.

“Pananglitan, maupay tagan iton mga OFWs hin insentibo ngan mga prebilihiyo sugad hin paghatag prayoridad ha panarabaho, 5 ngada 10 ka tuig nga tax holiday oras nga magdesisyon hiya magnegosyo, libre nga PhilHealth pareho han senior citizens,” sering ni Evardone. (30)

PARA HIN KADUGANGAN PA NGA MGA SUMAT SUGAD HINI, I-LIKE IT ATON FACEBOOK PAGE SANGKAY, I CLICK LA ADI:

Kuya Jayson M.

Balyu-an ni Kuya "Jayson M."

SOURCE: MARK O. ALIDO