Evardone: Liberal Party nagtikang rally ha Visayas

Personal nga gintambongan ni Eastern Samar Congressman Ben Pagaran Evardone ug han iya mga kaalyado ha Partido Liberal an Kick-off Campaign han Partido Liberal nga gindumara ha Roxas City, Capiz nga pinangunahan han Presidential candidate Mar Roxas ngan Vice Presidential candidate Leni Robredo ug han 12 nga mga kandidato ka Senador.

Guest of Honor han nasabi nga rally hi Presidente Benigno "Noy" Aquino III.

"Labot la nga kapartido naton hi Mar Roxas, usa hiya nga taga Visayas nga nagpakita han iya suporta labi na gud han mga Congressman nga tikang ha Visayas o an Visayan block," sering ni Evardone.

"Hataas an parespeto ni Mar Roxas ha mga igkasi taga Visayas nga mga Konggresista, ngan masesering hataas iya pagtapud ha abilidad han mga taga Visayas," dugang pa ni Evardone.

Mahinunumduman nga komo Sekretaryo ha Department of Interior and Local Government o DILG, hi Congressman Evardone an nagdepensa han budget han nasabi nga ahensya tikang han 2014, 2015, ngan 2016.

"Diri makuri pagkumbinser ha aton mga kausa ha Konggreso an pagpa aprubar han budget kay an iginlatag han anay Secretay Mar Roxas nga mga programa in mahinungdanon ngan may-ada impact ha katawhan," sering ni Evardone.

Kaupod ha mga programa nga napapondohan han budget han DILG an pagpalit hin mga patrol cars han kapulisan, sugad man pondo pagpalit hin firetrucks nga ginpanhatag ha mga LGUs.

"Ine nga mga patrol o police cars in dako nga gamit ha aton mga kapulisan, ngan an Eastern Samar waray hingalimti ni anay Secretary Roxas," sering ni Evardone.

"An Salintubig program ni anay Secretary Mar Roxas in dinangat liwat nganhi ha Eastern Samar, ngan padayon ine madangat nganhi ha aton ilabi na nga an ginpili ni Mar Roxas nga magsaliwan ha iya komo DILG Secretary, hi Secretary Mel Senen Sarmiento, in taga Calbayog City," dugang pa ni Evardone.

"Waray man taga-Samar nga Senador ha pagkayana, at least an Samar may-ada DILG Secretary," sering Evardone.

Nakita hi Congressman Evardone hin mas progresibo nga Eastern Samar ha ilarom hin Roxas presidency.

"Magiging masayon an pangaro hin suporta kan Mar Roxas labi na parte hin resiliency programs kay hiya mismo nahikt-an an kakurian nga inabat han Eastern Samar han panahon han Bagyo Yolanda ngan Ruby," sering ni Evardone.

PARA HIN KADUGANGAN PA NGA MGA SUMAT SUGAD HINI, I-LIKE IT ATON FACEBOOK PAGE SANGKAY, I CLICK LA ADI:

Kuya Jayson M.

Balyu-an ni Kuya "Jayson M."

SOURCE: MARK O. ALIDO