Evardone: DOLE Programa para han 'Global Oil Price Down' Displaced OFWs kinahanglan mayda po

Samtang gintatagusya han Lider han Partido Liberal ngan ngan Eastern Samar Congressman Ben Pagaran Evardone an Department of Labor and Employment o DOLE ug mga kasugbong hine nga mga ahensiya han gobyerno dida han pagtindog han ira Programa ha pagbulig ha mga Overseas Foreign Workers o OFWs nga magpapauli tungod han kawaraan trabaho dara han padayon nga paghamubo han presyo han krudo ha bug-os nga kalibutan, nagsuhestyon hiya nga pilion an mga inisyatibo nga may-ada direkta o bisan diri direkta ngan maupay nga epekto ha sosyedad o katawhan.

Suhestyon ni Evardone nga kitaan ngan tagan konsiderasyon an panginahanglan han indibidwal nga OFW kay magkaiba-iba an mga rasones o motibo han kada tagsa nga OFW dida han iya pagdesisyon pagtrabaho ha gawas han nasud.

"An panginahanglan hadton tulo an anak ha kolehiyo in magkaiba hadton waray anak ha kolehiyo.sugad man, an panginahanglan han OFW nga may-ada pa utang in sigurado nga magkaiba hadton waray utang," sering ni Evardone.

Dugang pa ni Evardone, kinahanglan liwat tagan konsiderasyon ngan tagan mas dako nga kapital para pagpakabuhi o bisan pautang nga mas habubo an interes an mga OFW nga nagpaplano pagnegosyo labi na gud ha sektor hin agrikultura ngan sektor hin pagkaon, ug adton mga negosyonga maghahatag darudamo nga trabaho ha mga tawo.

"Pareho han Pantawid Pamilyang Pilipino Program o 4Ps, kinahanglan may-ada kaupod nga pag-implementar hin mga prayoridad nga palisiya han gobyerno, pareho nala han palisiya nga an panuyo makag-abre pangalayunan ngan an palisiya han pagkaada bastante nga pagkaon o food sufficiency," sering Evardone.

Karuyag liwat ni Evardone sigurohon han DOLE nga an mga natagan hin pondo pagnegosyo in diri magnegosyo hin pautang sugad hadton mga hataas an porsyento nga nagpapautang.

"Usa nga panuyo hine nga programa in para diri ine nga mga OFW nga mangunguli maging biktima hin mga 'loansharks', sanglit diri maupay kun hira mismo maging 'loansharks' gamit an kwarta nga tikang han pagbuhis ha mga tawo," sering ni Evardone.

Nagsuhestyon liwat hi Congressman Evardone nga ig-upod ha programa adton karuyag bumalik ha iba nga destinasyon nga iba nga nga trabaho.

"Pananglitan, nabati ako nga mayda mga seaman nga sakay ha mga oil tanker in maaapektuhan. Kun ine nga mga seaman karuyag magbag-o hin trabaho didto ha abroad, sugad hin pag-butcher, kinahanglan buligan hira tikang ha ira pag-training ka butcher ngada hiton hira pakalakat ha abroad, labot pa han ayuda ha ira tagsa nga pamilya samtang diri pa hira nakakalakat ha abroad," sering Evardone.

Ha di pala maiha nga balita ha Philippine Star online, iginpahamtang ni DOLE Secretary Rosalinda Baldoz an pagtungod han iya ahensya han importansya han paghatag ha mga OFWs hin bastante ngan mahinungdanon nga oportunidad para hin trabaho dinhe ha Pilipinas ngan ha pagpakabuhi agud hira maingganyo nga diri na gumawas han nasud.

“We just have to pin down which of our respective programs can be identified as possible areas of collaboration, develop OFW-tailored programs and services and direct these to OFWs for their own choosing,” ha pag eksplikar ni Baldoz.

Oras nga ine nga mga programa ha panarabahuan ug pagpakabuhi in mapili, nagsering hi Baldoz nga ig-enroll ine nga mga OFWs dida han ira Assist W.E.L.L. Program, an programa nga ginurusa an mga ayuda ha OFWs para han ira panarabaho, pakabuhi, problema legal, ngan welfare.

Dugang pa ni Baldoz nga padayon an pakig-istorya han DOLE ha pribado nga sektor komo ira partner ha pagsiguro nga ine nga mga OFWs matagan trabaho.

Samtang, iginpatapod ni Secretary Baldoz nga bastante an pondo para han repatriation ngan pwede hira makaaro bulig ha Overseas Workers Welfare Administration o OWWA oras nga kulangon hira pondo.

Iginpatapod naman ni OWWA chief Rebecca Calzado nga an iya ahensya kaupod han DOLE, ngan Philippine Overseas Employment Administration (POEA) in padayon nga natutok han sitwasyon ha Saudi Arabia ngan iba nga nasud ha Middle East.

Samtang, nagpahamtang hi Evardone han iya suporta pinaagi hin pagpasa hin balaudnon nga mag-aalotaga pondo para hine programa ngan para han repatriation, oras nga magkulang an mga pondo nga yana nakaalotaga para hine.

Ginpahinumdom liwat ni Evardone an nasabi nga mga ahensya agud diri hingalimtan hine program bisan an mga OFWs nga nagTNT ha iba nga nasud labi na gud ha Middle East.

PARA HIN KADUGANGAN PA NGA MGA SUMAT SUGAD HINI, I-LIKE IT ATON FACEBOOK PAGE SANGKAY, I CLICK LA ADI:

Kuya Jayson M.

Balyu-an ni Kuya "Jayson M."

SOURCE: MARK O. ALIDO