LTO-Borongan may excellent rating tikang ha CSC’s Anti-Red Tape Act Report Card Survey

Nakakarawat hin 93.15% nga rating an Borongan City District Office han Land Transportation Office han 2015 implementation hadton kanan Civil Service Commission Anti-Red Tape Act Report Card Survey kumo base ha Republic Act 9485.

Sumala kan LTO-Borongan chief Narcisa Tabarnero, natagan hir ahin pagkilala han CSC hadton February 01, 2016 ha Tacloban City kaupod an pira pa nga awardees ha aton probinsya sugad nala han Government Service Insurance System(GSIS)-Borongan Satellite Office ug an Philippine Health Insurance Corporation (PhilHealth)-Borongan.

Iguinsaysay ni Tabarnero nga an survey in guinbuhat han CSC ha mga kleyente han LTO. Ira gud guin-evaluate hin tiupay an client satisfaction ha ira mga frontline services sugad ha paghatag hin penalidad ha mga traffic law violators, licensing, ug adton pagpa-rehistro hiton ira mga sarakyan.

Guindugang pa ni Tabarnero nga an anay upat ka oras nga pag-proseso ha pagkuha hin driver’s license in yana ira guinpahalipot ha duha ka oras. Samtang an processing time naman ha pagkuha hiton student driver’s license in 30 minutos nala.

Sumala pa kan Tabarnero, ha luyo nga diri pa nira ma kontrol an pagka-delay ha pag-release hiton driver’s license cards han ira mga aplikante, in nagpatapod naman an top management han LTO nga ira guinbubuhat an ngatanan nga ini in masulosyonan ha pinakamadagmit nga panahon.

Guinsiring guihapon han LTO chief nga ira kinikita nga mas magigin-epektibo ngan efficient yana nga 2016 iton ira services ha bug-os nga probinsya. Mahitungod hini, nananawagan hiya ha publiko nga sundon gud iton mga balaud ha trapiko para malikyan iton mga aksidente ha kalsada. Nahibaru-an kasi ha pinaka-urhi nga 'forum on road safety' nga pinangunahan han Eastern Samar Peace and Development Council(PPOC) nga kadak-an ha mga aksidente dinhi ha aton probinsya in durot ha pag-over speeding hiton mga drivers, ilabi na an public utility vehicles (PUVs).

Iguindoon naman ni Tabarnero nga an iguintutugot la nga speed limit hiton mga sarakyan base ha Republic Act 4136 in 80 kilometer per hour. Pero maoobserbaran daw, siring niya nga nagsusobra an mga drivers ha iguinmamando nga speed limit nga naguiguing hinungdan hin damo nga road accidents. Ngan, base ha statistics han LTO-Regional Office mga 08 hasta 49 nga road accidents an nahipatik dinhi ha Eastern Samar han 2015.

Ha tinguha naman nga malikayan ini nga mga aksidente, in iguintalaan naman yana in usa nga dialogue nga pangungunahan hiton LTO ug aatendiran hiton mga representatives hiton Land Transportation Franchising and Regulatory Board (LTFRB), transport operators ha ton probinsya, ug pira pa nga mga stakeholders. Nahimo naman ini nga dialogue pinaagi hin resolution nga guin-aprubahan han ESPD Council.

PARA HIN KADUGANGAN PA NGA MGA SUMAT SUGAD HINI, I-LIKE IT ATON FACEBOOK PAGE SANGKAY, I CLICK LA ADI:

Kuya Jayson M.

Balyu-an ni Kuya "Jayson M."

SOURCE: PIA-RO8/Samuel D. Candido