Borongan Water District: We can no longer appease the ire of the discontented water concessionaires.

Borongan City - Diri na namon kaya pakalmahon yana iton kapungot hit mga tagkunsumo hiton tubig.

Ini an naguinpaglaygay ni Borongan Water District General Manager Elvira A. Horca pinaagi hin usa nga surat nga naka-address kan City Councilor Jennifer Anacio.

Guinbuhat han Manager an pahayag ha tinguha nga ipahunong la anay iton kinaadlaw nga pagkuha hin tubig ha mga fire hydrants agud ideliver ha barangay Bugas samtang guinhuhulat pa an katugutan hiton Members of the Board of Director han nasabi nga buhatan.

Ha una nga parte han surat in guinsiring ni Horca nga nakapagsumat ha iya in usa ha iya mga tawuhan nga may ada daw nag-hatod hin tubig nga fire truck hiton City Fire Department ha Barangay Bugas han nakalabay nga gab-i han Miyerkules.

Ini in bisan ha luyo nga daw guinsidngan niya an naghatod hin surat ha iya nga igpepresentar pa an nasabi nga 'request' ha Board of Directors.

Aram daw daman nira nga may ada hira social responsibility ha nasasakupan hiton ciudad pero mahitungod ha maiha na nga Il Niño ug denudation hiton kagugub-an in humabobo na hin duro iton awas hit tubig labi na ha Can-abong kun diin katunga nala iton sulod hit 10 pulgada dayametro nga ACP pipe.

Iguindoon ni Horca nga iton kinaadlaw nga pagkuha hin tubig ha mga hydrants in nagiging kawsa hin airlock nga iguinrereklamo hit ira mga concessionaires nga waray na naawas ha ira mga gripo.

Ha social media in may ada mga nagpahayag hin sentimyento mahitungod hini nga isyu. An iba naghihingyap nga makapag-convene na iton mga Board of Directors ug matagan na an nasabi nga Barangay hin tubig ha pagkabaraka hin mas diri maupay nga hitabo.

Upod na dida an pagkadismaya dara nga daw diri na ngani maupay iton serbisyo ha kabablayan in diri pa natugot nga magrasyon ha Barangay.

Sumala naman ha iba, madanay gab-i nala nagkakaada turo it ira mga gripo ug mahinay pa.

Mahinunumduman nga hadton nakalabay nga una nga semana hini nga bulan in nakapag-rasyon hin tubig ha Barangay Bugas an City Fire Department pinaagi kan Ma'am Cora Basada. Ini in kumo kabatunan ha panawagan ni Ate Nimfa Quirante han nasabi nga Barangay. Umabot ha pira ka adlaw an nasabi nga pag-rasyon hin tubig.

Dinhi ha Borongan, usa la an Bugas ha mga apektado hini nga El Niño. Damo pa nga mga barangay in may ada kakulangan hin tubig dinhi ha aton dapit. Ha aton naguin-pagbisita ha Barangay Can-aga, ini guihap it ira guinhihingyap nga bulig ha mga hintutuinan. An magkaada hira hin malalauman nga suplay hin tubig ha oras ngatanan.

Nahisumat nga madali mahubsan iton mga atabay ha nasabi nga Barangay. Kinahanglan nira nga pumila hin maiha nga panahon ug pag-dad-on tikang pa ha harayo nga guinkukuhaan hini.

PARA HIN KADUGANGAN PA NGA MGA SUMAT SUGAD HINI, I-LIKE IT ATON FACEBOOK PAGE SANGKAY, I CLICK LA ADI:

Kuya Jayson M.

KJM Promotions

SOURCE: Hermie Agarpao Oraya