Illegally-cut lumber ug mga sasakyan, nadakop hiton DENR-8

Nakumpiska hiton Department of Environment and Natural Resources regional office ha Eastern Visayas (DENR-8) in mga 'illegally-cut lumber' ug pira nga mga sasakyan nga guinamit ha ilegal nga binuhatan ha Samar.

Iguinsumat ni DENR-8 Regional Director Leonardo Sibbaluca ha mga reporters ha usa nga interview ha iya opisina ha Tacloban, Leyte kakulop, Dominggo, nga an magkasusrunod ug waray hunong nga operasyon nga guinbuhat han weekend pinaagi han 'joint anti-illegal logging operation' ha Barangay Tinabanan, Marabut, Samar in nakapagkumpiska ini hin kabug-usan nga 1,793 board feet hin 'illegally-cut lumber' nga maabot ha P89,650 an kabug-usan nga kantidad.

Guinsiring pa ni Sibbaluca nga an mga nakumpiska nga lumber in nai-deposito na ha Provincial Environment and Natural Resources Office ha Catbalogan City, Samar ngan Community Environment and Natural Resources Office ha Sta. Rita, Samar para hin safekeeping ug final disposition.

Iguinsumat pa ni Sibbaluca ha mga reporters nga guinkomposo an team hin mga tawuhan tikang ha DENR-8, Philippine Army, Land Transportation Office (LTO), local government unit ug han media kun diin 14 nga mga unregistered vehicles nga guinkokomposo hin siyam nga single nga motorsiklo, upat nga motorsiklo nga may sidecar ngan usa guihapon nga multipurpose van an nadakop.

Guintutuuhan, sumala kan Sibbaluca nga an nakumpiskar nga sasakyan in guinagamit ha pagbiyahe han mga ilegal nga kahoy tikang ha guba nga lugar hiton Marabut ngadto ha mga lokal nga manmamalit.

Samtang, ha pagkayana in 'impounded' na an nasabi nga mga sasakyan ha LTO compound hiton Tacloban.

Guinsiring pa niya nga an impormasyon, edukasyon ug mga campaign materials in naipanhatag na guihapon ha mga residente hiton Barangay Tinabanan ug hagrani nga lugar kun diin guin-aaghat an mga ini nga suportahan an mas pinakusog nga kampanya hiton DENR-8 ala kontra ha illegal logging hiton Sinirangan Bisayas.

SOURCE: Manila Bulletin/Restituto Cayubit